kis waqt hadson se paDa sabiqa mujhe

kis vaqt hādsoñ se paḌā sābiqa mujhe

ḳhud naag ban ke Dastā hai saaya mirā mujhe

maiñ ne ḳhushī se bār-e-amānat uThā liyā

hairat se takte rah ga.e arz-o-samā mujhe

ehsā-e-dard lazzat-e-ġham pyaar kā ḳhumār

mat pūchh bazm-e-nāz se kyā kyā milā mujhe

ye inkishāf-e-zāt hai me.arāj-e-zindagī

kuchh bhī nahīñ hai yaad ḳhudā ke sivā mujhe

taqrīr kaam aa.ī na tahrīr umr bhar

ik jumbish-e-nigāh ne chauñkā diyā mujhe

phir muskurā uThe haiñ mere zaḳhm-hā-e-dil

phir terī yaad ban ga.ī ik sāneha mujhe

sub.h-e-nashāt-e-dil hai na shām-e-ġham-e-'hayāt'

ai iztirāb-e-shauq kahāñ le chalā mujhe

kis waqt hadson se paDa sabiqa mujhe

KHud nag ban ke Dasta hai saya mera mujhe

main ne KHushi se bar-e-amanat uTha liya

hairat se takte rah gae arz-o-sama mujhe

ehsa-e-dard lazzat-e-gham pyar ka KHumar

mat puchh bazm-e-naz se kya kya mila mujhe

ye inkishaf-e-zat hai mearaj-e-zindagi

kuchh bhi nahin hai yaad KHuda ke siwa mujhe

taqrir kaam aai na tahrir umr bhar

ek jumbish-e-nigah ne chaunka diya mujhe

phir muskura uThe hain mere zaKHm-ha-e-dil

phir teri yaad ban gai ek saneha mujhe

subh-e-nashat-e-dil hai na sham-e-gham-e-'hayat'

ai iztirab-e-shauq kahan le chala mujhe