kise ab dastan apni sunaen

kise ab dāstāñ apnī sunā.eñ

muqābil aa.ine ke baiTh jaa.eñ

jo aatā hai guzar jaatā hai phir bhī

zamīn-e-dil kī ḳhaak ab kyuuñ uḌā.eñ

hazāroñ log tishna-lab yahāñ haiñ

vuzū kaise kareñ kaise nahā.eñ

añdherā hī añdherā har taraf hai

charāġh-e-dil kahāñ tak ham jalā.eñ

usī ik baat kā charchā bahut hai

jise ham ne to chāhā thā chhupā.eñ

chaman kā gosha gosha jal rahā hai

kisī chhoḌeñ yahāñ kis ko bachā.eñ

zamīñ kā ek TukḌā hai jahāñ par

adab ke saath chaltī hai havā.eñ

musalsal zaḳhm kā parda kahāñ tak

kahāñ tak tiir khā kar muskurā.eñ

nazar kī sham.a raushan kar rahā huuñ

na jaane kab sitāre Duub jaa.eñ

abhī itnī mohabbat bhī bahut hai

ga.e vo din ki tum ko āzmā.eñ

bichhaunā bhī nahīñ hai aaj 'tālib'

taḌap ġham niiñd aañsū kyā bichhā.eñ

kise ab dastan apni sunaen

muqabil aaine ke baiTh jaen

jo aata hai guzar jata hai phir bhi

zamin-e-dil ki KHak ab kyun uDaen

hazaron log tishna-lab yahan hain

wuzu kaise karen kaise nahaen

andhera hi andhera har taraf hai

charagh-e-dil kahan tak hum jalaen

usi ek baat ka charcha bahut hai

jise hum ne to chaha tha chhupaen

chaman ka gosha gosha jal raha hai

kisi chhoDen yahan kis ko bachaen

zamin ka ek TukDa hai jahan par

adab ke sath chalti hai hawaen

musalsal zaKHm ka parda kahan tak

kahan tak tir kha kar muskuraen

nazar ki shama raushan kar raha hun

na jaane kab sitare Dub jaen

abhi itni mohabbat bhi bahut hai

gae wo din ki tum ko aazmaen

bichhauna bhi nahin hai aaj 'talib'

taDap gham nind aansu kya bichhaen