kise bataen ki zad-e-safar gaya kab ka

kise batā.eñ ki zād-e-safar gayā kab kā

rahā hī kyā hai ġham-e-mo'tabar gayā kab kā

mujhe bhī dekh ki maiñ ek naqsh-e-hairat huuñ

dikhā ke aa.ina ā.īna-gar gayā kab kā

talāsh sahrā-ba-sahrā jise kiyā maiñ ne

vo merī ruuh ke andar utar gayā kab kā

duā rahīn-e-asar hai ye baat sach hai magar

mirī duā se yaqīnan asar gayā kab kā

na sañg-e-mīl na jaada na koī manzil-e-shauq

akelā maiñ huuñ mirā ham-safar gayā kab kā

koī umiid na ḳhvāhish na aarzū baaqī

ki mere jism kā insān mar gayā kab kā

'habāb' ek tanāvar daraḳht thā maiñ bhī

pa TuuT TuuT ke āḳhir bikhar gayā kab kā

kise bataen ki zad-e-safar gaya kab ka

raha hi kya hai gham-e-mo'tabar gaya kab ka

mujhe bhi dekh ki main ek naqsh-e-hairat hun

dikha ke aaina aaina-gar gaya kab ka

talash sahra-ba-sahra jise kiya main ne

wo meri ruh ke andar utar gaya kab ka

dua rahin-e-asar hai ye baat sach hai magar

meri dua se yaqinan asar gaya kab ka

na sang-e-mil na jada na koi manzil-e-shauq

akela main hun mera ham-safar gaya kab ka

koi umid na KHwahish na aarzu baqi

ki mere jism ka insan mar gaya kab ka

'habab' ek tanawar daraKHt tha main bhi

pa TuT TuT ke aaKHir bikhar gaya kab ka