kise hum apna kahen koi gham-gusar nahin

kise ham apnā kaheñ koī ġham-gusār nahīñ

hameñ jab apne parā.e pe e'tibār nahīñ

ham apne daur kī sachchā.iyoñ ko likhte haiñ

qalam hamārā kisī kā to musta.ār nahīñ

jo be-vafā the vahī log pā ga.e e.azāz

mirī vafāoñ kā ab tak kahīñ shumār nahīñ

hamāre sar pe baras jā.eñge kahāñ patthar

tunak-mizājī-e-mausam kā e'tibār nahīñ

duā.eñ de ke jo bachchoñ ko shahr bhejeñge

ab aise gaañv meñ koī buzurgvār nahīñ

hazār muflis-o-nādār maiñ sahī 'rahbar'

ḳhudā kā shukr kisī kā bhī qarz-dār nahīñ

kise hum apna kahen koi gham-gusar nahin

hamein jab apne parae pe e'tibar nahin

hum apne daur ki sachchaiyon ko likhte hain

qalam hamara kisi ka to mustaar nahin

jo be-wafa the wahi log pa gae eazaz

meri wafaon ka ab tak kahin shumar nahin

hamare sar pe baras jaenge kahan patthar

tunak-mizaji-e-mausam ka e'tibar nahin

duaen de ke jo bachchon ko shahr bhejenge

ab aise ganw mein koi buzurgwar nahin

hazar muflis-o-nadar main sahi 'rahbar'

KHuda ka shukr kisi ka bhi qarz-dar nahin