kise KHabar thi ki jite ji bhi wo daur aayega zindagi ka

kise ḳhabar thī ki jiite jī bhī vo daur āye.gā zindagī kā

ki hogā mahsūs har nafas ye na koī merā na maiñ kisī kā

hudūd-e-vahm-o-gumāñ se guzrā makāñ to kyā lā-makāñ se guzrā

rukegā āḳhir kahāñ pahuñch kar ye kārvāñ zauq-e-āgahī kā

jo mere dil se thā un ko karnā na kar sakīñ aap kī nigāheñ

mirī tabī.at meñ naqs jo hai qusūr hai vo bhī aap hī kā

hai qābil-e-rahm un kī hālat na kījiye aap un se nafrat

dar-asl ehsās-e-kamtarī hai jinheñ hai kuchh naaz bartarī kā

sikhāne vaale to aa.e paiham har ik zamīñ par har ik zamāñ meñ

magar ham aise hī bad-guhar the salīqa aayā na zindagī kā

ye ham ne maanā ki is jahāñ meñ ḳhulūs-e-jins-e-garāñ hai lekin

kabhī to yaaro ḳhulūs barto bharam to rah jaa.e dostī kā

jo husn-e-pur-kār par fidā haiñ unheñ 'razā' kaun ye batā.e

vo husn hai fitna-e-qayāmat lagā.e ġhāza jo sādgī kā

kise KHabar thi ki jite ji bhi wo daur aayega zindagi ka

ki hoga mahsus har nafas ye na koi mera na main kisi ka

hudud-e-wahm-o-guman se guzra makan to kya la-makan se guzra

rukega aaKHir kahan pahunch kar ye karwan zauq-e-agahi ka

jo mere dil se tha un ko karna na kar sakin aap ki nigahen

meri tabiat mein naqs jo hai qusur hai wo bhi aap hi ka

hai qabil-e-rahm un ki haalat na kijiye aap un se nafrat

dar-asl ehsas-e-kamtari hai jinhen hai kuchh naz bartari ka

sikhane wale to aae paiham har ek zamin par har ek zaman mein

magar hum aise hi bad-guhar the saliqa aaya na zindagi ka

ye hum ne mana ki is jahan mein KHulus-e-jins-e-garan hai lekin

kabhi to yaro KHulus barto bharam to rah jae dosti ka

jo husn-e-pur-kar par fida hain unhen 'raza' kaun ye batae

wo husn hai fitna-e-qayamat lagae ghaza jo sadgi ka