kise KHabar thi ki KHud ko wo yun chhupaega

kise ḳhabar thī ki ḳhud ko vo yuuñ chhupā.egā

aur apne naqsh ko lahroñ pe chhoḌ jā.egā

ḳhamosh rahne kī aadat bhī maar detī hai

tumheñ ye zahr to andar se chaaT jā.egā

kuchh aur der Thahar jaao ḳhvāb-zāroñ meñ

vo aks hī sahī lekin nazar to aa.egā

bachā sako to bachā lo ye āsmāñ ye zamīñ

zarā sī der meñ ye ashk phail jā.egā

ye apne dhyān meñ rakhnā ki maiñ na aayā to

tulū-e-sub.h kī ḳhātir kise bulā.egā

bahut huā to yahī hogā ai mire 'ḳhurshīd'

vo shaḳhs jā ke kabhī lauT kar na aa.egā

kise KHabar thi ki KHud ko wo yun chhupaega

aur apne naqsh ko lahron pe chhoD jaega

KHamosh rahne ki aadat bhi mar deti hai

tumhein ye zahr to andar se chaT jaega

kuchh aur der Thahar jao KHwab-zaron mein

wo aks hi sahi lekin nazar to aaega

bacha sako to bacha lo ye aasman ye zamin

zara si der mein ye ashk phail jaega

ye apne dhyan mein rakhna ki main na aaya to

tulu-e-subh ki KHatir kise bulaega

bahut hua to yahi hoga ai mere 'KHurshid'

wo shaKHs ja ke kabhi lauT kar na aaega