kise KHabar thi labon se hansi bhi chhinega

kise ḳhabar thī laboñ se hañsī bhī chhīnegā

zamāna ham se hamārī ḳhushī bhī chhīnegā

sahārā kaun ġharīboñ ko dost detā hai

ġharīb kī to koī jhoñpaḌī bhī chhīnegā

usī ke dam se hai qaa.em nizām sāñsoñ kā

ye zindagī hai usī kī kabhī bhī chhīnegā

ye baat sun ke ta.ajjub sā ho rahā hai hameñ

kabhī kisī kī koī zindagī bhī chhīnegā

lagā de shauq se koī qalam pe pābandī

hai kis meñ dam jo mirī shā.irī bhī chhīnegā

hai sādgī to azal se hī merī fitrat meñ

vo kaun hai jo mirī sādgī bhī chhīnegā

chaman meñ sho.ala jo nafrat kā uTh rahā hai yahāñ

hañsī guloñ kī vahī tāzgī bhī chhīnegā

añdhere jis ko muqaddar ne de diye haiñ 'mukesh'

vo sochtā hai mirī raushnī bhī chhīnegā

kise KHabar thi labon se hansi bhi chhinega

zamana hum se hamari KHushi bhi chhinega

sahaara kaun gharibon ko dost deta hai

gharib ki to koi jhonpaDi bhi chhinega

usi ke dam se hai qaem nizam sanson ka

ye zindagi hai usi ki kabhi bhi chhinega

ye baat sun ke tajjub sa ho raha hai hamein

kabhi kisi ki koi zindagi bhi chhinega

laga de shauq se koi qalam pe pabandi

hai kis mein dam jo meri shairi bhi chhinega

hai sadgi to azal se hi meri fitrat mein

wo kaun hai jo meri sadgi bhi chhinega

chaman mein shoala jo nafrat ka uTh raha hai yahan

hansi gulon ki wahi tazgi bhi chhinega

andhere jis ko muqaddar ne de diye hain 'mukesh'

wo sochta hai meri raushni bhi chhinega