kise pukare madad ko kise bulae badan

kise pukāre madad ko kise bulā.e badan

akele ishq ko kaise sañbhāl paa.e badan

maiñ apnī ruuh se milvā duuñ us ko ḳhush ho kar

vo darmiyān se apne agar haTā.e badan

na jaane phūñk diyā kyā shikārī ne paḌh kar

chhurī ke nīche parindoñ ne ḳhud bichhā.e badan

kabhī jo dekho to bāzār-e-husn meñ jā kar

yahāñ vahāñ rakhe hoñge saje sajā.e badan

añdhere ḳhauf ke tabdīl hoñ ujāloñ meñ

hamārī qabr meñ ai kaash terā aa.e badan

are shu.ūr nahīñ hai use to itnā bhī

chhupā.e bhī to vo kis tarah se chhupā.e badan

ye jī meñ aatā hai ab to utaar kar rakh deñ

kahāñ kahāñ phireñ āḳhir 'shikhā' uThā.e badan

kise pukare madad ko kise bulae badan

akele ishq ko kaise sanbhaal pae badan

main apni ruh se milwa dun us ko KHush ho kar

wo darmiyan se apne agar haTae badan

na jaane phunk diya kya shikari ne paDh kar

chhuri ke niche parindon ne KHud bichhae badan

kabhi jo dekho to bazar-e-husn mein ja kar

yahan wahan rakhe honge saje sajae badan

andhere KHauf ke tabdil hon ujalon mein

hamari qabr mein ai kash tera aae badan

are shuur nahin hai use to itna bhi

chhupae bhi to wo kis tarah se chhupae badan

ye ji mein aata hai ab to utar kar rakh den

kahan kahan phiren aaKHir 'shikha' uThae badan