kise shuur hai yun zaKHm-e-dil dikhane ka

kise shu.ūr hai yuuñ zaḳhm-e-dil dikhāne kā

kahīñ na dekhoge ye rañg muskurāne kā

mirā lahū hai nigār-e-hayāt kī mehñdī

mujhe dimāġh kahāñ ashk-e-ḳhūñ bahāne kā

nashāt-e-ġham hī to is zindagī kā hāsil hai

agar ho dil meñ salīqa ye lutf paane kā

qafas meñ jalva-e-gul kā bhī ehtimām sahī

magar vo ālam-e-āzād āshiyāne kā

jo zarra hai vo dhaḌaktā huā sā ik dil hai

ye kā.enāt ta.assur hai kis tarāne kā

sitāroñ meñ hī tarannum shagūfoñ meñ gulbāñg

kahāñ nahīñ hai fusūñ un ke gungunāne kā

mirā suḳhan hai manār un ke husn kā 'kaukab'

hilā sakegā na tūfāñ kisī zamāne kā

kise shuur hai yun zaKHm-e-dil dikhane ka

kahin na dekhoge ye rang muskurane ka

mera lahu hai nigar-e-hayat ki mehndi

mujhe dimagh kahan ashk-e-KHun bahane ka

nashat-e-gham hi to is zindagi ka hasil hai

agar ho dil mein saliqa ye lutf pane ka

qafas mein jalwa-e-gul ka bhi ehtimam sahi

magar wo aalam-e-azad aashiyane ka

jo zarra hai wo dhaDakta hua sa ek dil hai

ye kaenat tassur hai kis tarane ka

sitaron mein hi tarannum shagufon mein gulbang

kahan nahin hai fusun un ke gungunane ka

mera suKHan hai manar un ke husn ka 'kaukab'

hila sakega na tufan kisi zamane ka