kise talash karen sharh-e-arzu ke liye

kise talāsh kareñ sharh-e-ārzū ke liye

zabān-e-hāl hī kaafī hai guftugū ke liye

vo aur maiñ jo haiñ duniyā-e-rang-o-bū ke liye

kiyā hai ḳhalq mujhe apnī justujū ke liye

sitam ke baa'd karam kī nigāh kyā ma.anī

jigar ke zaḳhm to hote nahīñ rafū ke liye

niyāz-o-nāz ke aa.iin koī kyā jaane

tirī talāsh rahī apnī justujū ke liye

adā huā na kabhī mudda.ā-e-dil ham se

vo vaqt mil bhī gayā us se guftugū ke liye

ġham-e-firāq se vābasta haiñ kuchh ummīdeñ

liyā hai saath ise terī justujū ke liye

mire ḳhayāl meñ aa.ī hai shāmat-e-dil aaj

machal rahā hai jo ye tujh se guftugū ke liye

hazār-haif mirā dil miTā diyā tū ne

yahī thā ek tire ġham kī aabrū ke liye

mile mile na mile vo to us kā ġham kyā hai

banī hai fitrat-e-ishq us kī justujū ke liye

ġham-e-hayāt kahāñ aur mujh sā rind kahāñ

ye kulfateñ haiñ faqat ek aarzū ke liye

vo aa.e aur chale bhī ga.e magar afsos

maiñ sochtā hī rahā un se guftugū ke liye

tirī talāsh to ḳhāmoshiyoñ meñ pinhāñ hai

ye zāhidān-e-zamāna haiñ hāo-hū ke liye

sitam-zarīfī-e-fitrat nahīñ to phir kyā hai

ki terā ishq hai mujh se farishta-ḳhū ke liye

vafā sarisht meñ shāmil hai merī ai 'sābir'

maiñ apnī ziist miTā dūñgā aabrū ke liye

kise talash karen sharh-e-arzu ke liye

zaban-e-haal hi kafi hai guftugu ke liye

wo aur main jo hain duniya-e-rang-o-bu ke liye

kiya hai KHalq mujhe apni justuju ke liye

sitam ke ba'd karam ki nigah kya mani

jigar ke zaKHm to hote nahin rafu ke liye

niyaz-o-naz ke aain koi kya jaane

teri talash rahi apni justuju ke liye

ada hua na kabhi muddaa-e-dil hum se

wo waqt mil bhi gaya us se guftugu ke liye

gham-e-firaq se wabasta hain kuchh ummiden

liya hai sath ise teri justuju ke liye

mere KHayal mein aai hai shamat-e-dil aaj

machal raha hai jo ye tujh se guftugu ke liye

hazar-haif mera dil miTa diya tu ne

yahi tha ek tere gham ki aabru ke liye

mile mile na mile wo to us ka gham kya hai

bani hai fitrat-e-ishq us ki justuju ke liye

gham-e-hayat kahan aur mujh sa rind kahan

ye kulfaten hain faqat ek aarzu ke liye

wo aae aur chale bhi gae magar afsos

main sochta hi raha un se guftugu ke liye

teri talash to KHamoshiyon mein pinhan hai

ye zahidan-e-zamana hain hao-hu ke liye

sitam-zarifi-e-fitrat nahin to phir kya hai

ki tera ishq hai mujh se farishta-KHu ke liye

wafa sarisht mein shamil hai meri ai 'sabir'

main apni zist miTa dunga aabru ke liye