kisht-e-dayar-e-subh se tare ugaun main

kisht-e-dayār-e-sub.h se taare ugā.ūñ maiñ

jī chāhtā hai nit-na.e manzar dikhā.ūñ maiñ

vo shaḳhs chīḳhtā huā amboh ban chukā

kis kis ko bolne duuñ kise chup karā.ūñ maiñ

ab to hañsī bhī ḳhatm hai afsurdagī bhī ḳhatm

lab-basta-e-azal tujhe kitnā hañsā.ūñ maiñ

ik ḳhvāb misl-e-ashk nikal aa.e chashm se

darvāza-e-gumāñ jo kabhī khaTkhaTā.ūñ maiñ

tū aa chukā hai dekh liyā maan bhī liyā

ab aur kyā karūñ tujhe sar par biThā.ūñ maiñ

kyā farq paḌ sakegā añdhere kī sharh meñ

kuchh der raushnī se agar bhar bhī jā.ūñ maiñ

ḳhāmosh rah ki phir tirī āvāz sun sakūñ

nazroñ se duur jā ki tujhe dekh pā.ūñ maiñ

ā.īne is tarah mujhe taktā hai kis liye

pahchān bhī liyā ki ta.āruf karā.ūñ maiñ

'shāriq' har ek shakl se miltī hai koī shakl

āḳhir badan pe kaun sā chehra lagā.ūñ maiñ

kisht-e-dayar-e-subh se tare ugaun main

ji chahta hai nit-nae manzar dikhaun main

wo shaKHs chiKHta hua amboh ban chuka

kis kis ko bolne dun kise chup karaun main

ab to hansi bhi KHatm hai afsurdagi bhi KHatm

lab-basta-e-azal tujhe kitna hansaun main

ek KHwab misl-e-ashk nikal aae chashm se

darwaza-e-guman jo kabhi khaTkhaTaun main

tu aa chuka hai dekh liya man bhi liya

ab aur kya karun tujhe sar par biThaun main

kya farq paD sakega andhere ki sharh mein

kuchh der raushni se agar bhar bhi jaun main

KHamosh rah ki phir teri aawaz sun sakun

nazron se dur ja ki tujhe dekh paun main

aaine is tarah mujhe takta hai kis liye

pahchan bhi liya ki taaruf karaun main

'shaariq' har ek shakl se milti hai koi shakl

aaKHir badan pe kaun sa chehra lagaun main