kisht-e-viran ki tarah tishna rahi raat meri

kisht-e-vīrāñ kī tarah tishna rahī raat mirī

lauT aa.ī tire dar se bhī munājāt mirī

to lahū ban ke ragoñ meñ mirī dauḌā lekin

tishna-e-dīd rahī tujh se mulāqāt mirī

dil pe khulte nahīñ asrār-e-vajūd aur adam

yahī hairān-nigāhī hai mukāfāt mirī

kaun samjhā mirī bedār-nigāhī kī hudūd

yuuñ to har haath meñ thī sharh-e-hikāyāt mirī

garche āvāra rahe mere fasāne har sū

rāz-e-sar-basta zamāne meñ rahī zaat mirī

sāz-o-āhañg kā e.ajāz thā har lafz mirā

phūñk Daalī ḳhas-o-ḳhāshāk ne sauġhāt mirī

haiñ zamīñ aur zamāñ dūd-e-charāġh-e-shab-e-ġham

mujh ko le aa.ī kahāñ gardish-e-hālāt mirī

kisht-e-viran ki tarah tishna rahi raat meri

lauT aai tere dar se bhi munajat meri

to lahu ban ke ragon mein meri dauDa lekin

tishna-e-did rahi tujh se mulaqat meri

dil pe khulte nahin asrar-e-wajud aur adam

yahi hairan-nigahi hai mukafat meri

kaun samjha meri bedar-nigahi ki hudud

yun to har hath mein thi sharh-e-hikayat meri

garche aawara rahe mere fasane har su

raaz-e-sar-basta zamane mein rahi zat meri

saz-o-ahang ka eajaz tha har lafz mera

phunk Dali KHas-o-KHashak ne saughat meri

hain zamin aur zaman dud-e-charagh-e-shab-e-gham

mujh ko le aai kahan gardish-e-haalat meri