کسی بدن کی تمنا میں غم نکل آئے

کسی بدن کی تمنا میں غم نکل آئے

غموں کو بھوک لگی تھی سو ہم نکل آئے

عجب سخی ہے زمانہ میں بانٹ دیتا ہے

میں جتنا عشق اسے دے دوں کم نکل آئے

وہ مفلسی تھی کہ میں ہجر کھا کے زندہ رہا

وصال خور جو سن لیں تو دم نکل آئے

مجھے وہ عشق ہوا ہے کہ میں اگر چاہوں

صنم کدے میں بھی حد حرم نکل آئے

میں سیدھی سیدھی لٹوں پر کتھائیں لکھتا تھا

پہ تیری زلف کہانی میں خم نکل آئے

یہ تشنہ لب جنہیں مارا گیا ہے دریا پر

یہ لوگ چاہیں تو سورج بھی نم نکل آئے