kisi badan ki tamanna mein gham nikal aae

kisī badan kī tamanna meñ ġham nikal aa.e

ġhamoñ ko bhuuk lagī thī so ham nikal aa.e

ajab saḳhī hai zamāne meñ baañT detā hai

maiñ jitnā ishq use de duuñ kam nikal aa.e

vo muflisī thī ki maiñ hijr khā ke zinda rahā

visāl-ḳhor jo sun leñ to dam nikal aa.e

mujhe vo ishq huā hai ki maiñ agar chāhūñ

sanam-kade meñ bhī hadd-e-haram nikal aa.e

maiñ sīdhī sīdhī laToñ par kathā.eñ likhtā thā

pa terī zulf-e-kahānī meñ ḳham nikal aa.e

ye tishna-lab jinheñ maarā gayā hai dariyā par

ye log chāheñ to sūraj bhī nam nikal aa.e

kisi badan ki tamanna mein gham nikal aae

ghamon ko bhuk lagi thi so hum nikal aae

ajab saKHi hai zamane mein banT deta hai

main jitna ishq use de dun kam nikal aae

wo muflisi thi ki main hijr kha ke zinda raha

visal-KHor jo sun len to dam nikal aae

mujhe wo ishq hua hai ki main agar chahun

sanam-kade mein bhi hadd-e-haram nikal aae

main sidhi sidhi laTon par kathaen likhta tha

pa teri zulf-e-kahani mein KHam nikal aae

ye tishna-lab jinhen mara gaya hai dariya par

ye log chahen to suraj bhi nam nikal aae