kisi bargad ka sar-e-rah na ehsan liya

kisī bargad kā sar-e-rāh na ehsān liyā

apnā saaya thā kaḌī dhuup meñ ḳhud taan liyā

bhes badle to bahut ham ne havā ke Dar se

sang-o-dīvār ne har shahr meñ pahchān liyā

log ḳhvāboñ ke darīchoñ meñ chhupe baiThe haiñ

hākim-e-shahr ne har shaḳhs kā īmān liyā

naqd-e-jāñ kufr kī bastī meñ chhupāyā to bahut

sangg-sāroñ ne magar duur se pahchān liyā

sar meñ saudā thā nigāhoñ kā safar lambā thā

ham ne ik shaḳhs ko ghabrā ke ḳhudā maan liyā

jo bhī saaya milā ham chal paḌe pīchhe pīchhe

rāsta ishq meñ ham ne bahut āsān liyā

koī chehre se raqīboñ ke na sarkā.e naqāb

bevafā kaun hai kitnā hai bahut jaan liyā

kisi bargad ka sar-e-rah na ehsan liya

apna saya tha kaDi dhup mein KHud tan liya

bhes badle to bahut hum ne hawa ke Dar se

sang-o-diwar ne har shahr mein pahchan liya

log KHwabon ke darichon mein chhupe baiThe hain

hakim-e-shahr ne har shaKHs ka iman liya

naqd-e-jaan kufr ki basti mein chhupaya to bahut

sangg-saron ne magar dur se pahchan liya

sar mein sauda tha nigahon ka safar lamba tha

hum ne ek shaKHs ko ghabra ke KHuda man liya

jo bhi saya mila hum chal paDe pichhe pichhe

rasta ishq mein hum ne bahut aasan liya

koi chehre se raqibon ke na sarkae naqab

bewafa kaun hai kitna hai bahut jaan liya