kisi bhi dar ki sawali nahin rahi hogi

kisī bhī dar kī savālī nahīñ rahī hogī

jhukī jo ishq ke dar par jabīñ rahī hogī

vagarna tark-e-vafā sahl is qadar thā kahāñ

kamī mujhī meñ yaqīnan kahīñ rahī hogī

jo gor-e-aql meñ kī dafn aarzū tum ne

tumhāre dil meñ kabhī jāguzīñ rahī hogī

vo jin ke sar se uThā āsmān kā saaya

kab un ke paañv ke nīche zamīñ rahī hogī

abhī to girya-kunāñ haiñ khañDar kī dīvāreñ

ga.e dinoñ meñ havelī hasīñ rahī hogī

tire jahāñ se nikal kar bhī ham kahāñ nikle

hamārī yaad tirī ham-nashīñ rahī hogī

tabhī to us ne 'tabassum' kī bandagī kī hai

rag-e-gulū se bhī baḌh kar qarīñ rahī hogī

kisi bhi dar ki sawali nahin rahi hogi

jhuki jo ishq ke dar par jabin rahi hogi

wagarna tark-e-wafa sahl is qadar tha kahan

kami mujhi mein yaqinan kahin rahi hogi

jo gor-e-aql mein ki dafn aarzu tum ne

tumhaare dil mein kabhi jaguzin rahi hogi

wo jin ke sar se uTha aasman ka saya

kab un ke panw ke niche zamin rahi hogi

abhi to girya-kunan hain khanDar ki diwaren

gae dinon mein haweli hasin rahi hogi

tere jahan se nikal kar bhi hum kahan nikle

hamari yaad teri ham-nashin rahi hogi

tabhi to us ne 'tabassum' ki bandagi ki hai

rag-e-gulu se bhi baDh kar qarin rahi hogi