kisi bhi haal mein mujhse ye samjhauta nahin hoga

kisī bhī haal meñ mujh se ye samjhautā nahīñ hogā

tire qadmoñ meñ sar rakh duuñ nahīñ aisā nahīñ hogā

ajūbe saat hī jis ko nazar aa.e haiñ duniyā meñ

mirā dā'vā hai us ne aap ko dekhā nahīñ hogā

maiñ kitnā be-ḳhabar thā us se mil ke aaj ye jaanā

mujhe lagtā thā vo dariyā hai vo pyāsā nahīñ hogā

mujhe vā'de pe us ke aaj bhī puurā bharosa hai

vo us ke saath to hogā magar us kā nahīñ hogā

zarā sī baat par jo aa gayā ghar se 'adālat tak

vo samjhauta to ho saktā hai par rishta nahīñ hogā

tum apnī pyaas le kar jis kī chaukhaT se chale aa.e

vo sahrā ho gayā hogā vo ab dariyā nahīñ hogā

badalte vaqt ne sab kuchh badal Daalā 'ratan' dekho

tumheñ ab bhī yahī lagtā hai vo badlā nahīñ hogā

kisi bhi haal mein mujh se ye samjhauta nahin hoga

tere qadmon mein sar rakh dun nahin aisa nahin hoga

ajube sat hi jis ko nazar aae hain duniya mein

mera da'wa hai us ne aap ko dekha nahin hoga

main kitna be-KHabar tha us se mil ke aaj ye jaana

mujhe lagta tha wo dariya hai wo pyasa nahin hoga

mujhe wa'de pe us ke aaj bhi pura bharosa hai

wo us ke sath to hoga magar us ka nahin hoga

zara si baat par jo aa gaya ghar se 'adalat tak

wo samjhauta to ho sakta hai par rishta nahin hoga

tum apni pyas le kar jis ki chaukhaT se chale aae

wo sahra ho gaya hoga wo ab dariya nahin hoga

badalte waqt ne sab kuchh badal Dala 'ratan' dekho

tumhein ab bhi yahi lagta hai wo badla nahin hoga