kisi bhi moD pe roka na gumrahi se mujhe

kisī bhī moḌ pe rokā na gumrahī se mujhe

koī gila bhī nahīñ apnī zindagī se mujhe

sabhoñ se miltā huuñ begāna-e-talab ho kar

na dostī se ġharaz hai na dushmanī se mujhe

safar se pahle zarūrī hai mudda.ā-e-safar

patā chalā ye sitāroñ kī kajravī se mujhe

faqīr-e-shahr to huuñ maiñ gadā-e-rāh nahīñ

karam kī bhiik na de aisī be-ruḳhī se mujhe

mire jilau meñ chalegā samundaroñ kā jalāl

na rok pā.egā koī shanāvarī se mujhe

rah-e-hayāt meñ kāñToñ ne mehrbāñ ho kar

bachā liyā hai azāb-e-shaguftagī se mujhe

kisī se mil ke bichhaḌne kī jab ghaḌī aa.ī

ghaḌī se ho ga.ī nafrat usī ghaḌī se mujhe

añdherī raat meñ dekhā hai mash.aloñ kā julūs

Darā diyā hai siyāsat ne raushnī se mujhe

mirī anā ne sabaq de ke ḳhud-parastī kā

chhuḌā diyā hai zamāne kī bandagī se mujhe

fareb-ḳhurda-e-tahrīk-e-ādmiyyat huuñ

vafā kī aas nahīñ 'ramz' aadmī se mujhe

kisi bhi moD pe roka na gumrahi se mujhe

koi gila bhi nahin apni zindagi se mujhe

sabhon se milta hun begana-e-talab ho kar

na dosti se gharaz hai na dushmani se mujhe

safar se pahle zaruri hai muddaa-e-safar

pata chala ye sitaron ki kajrawi se mujhe

faqir-e-shahr to hun main gada-e-rah nahin

karam ki bhik na de aisi be-ruKHi se mujhe

mere jilau mein chalega samundaron ka jalal

na rok paega koi shanawari se mujhe

rah-e-hayat mein kanTon ne mehrban ho kar

bacha liya hai azab-e-shaguftagi se mujhe

kisi se mil ke bichhaDne ki jab ghaDi aai

ghaDi se ho gai nafrat usi ghaDi se mujhe

andheri raat mein dekha hai mashalon ka julus

Dara diya hai siyasat ne raushni se mujhe

meri ana ne sabaq de ke KHud-parasti ka

chhuDa diya hai zamane ki bandagi se mujhe

fareb-KHurda-e-tahrik-e-admiyyat hun

wafa ki aas nahin 'ramz' aadmi se mujhe