کسی بھی طرح نہیں تم کو بھولنے کا ہے

کسی بھی طرح نہیں تم کو بھولنے کا ہے

ذرا سا دل ہے مگر کتنا بے کہے کا ہے

وہ لہر آتی ہے جاتی ہے ایک لمحہ میں

پھر اس کے بعد ہے جو کچھ وہ سوچنے کا ہے

بچانے والا بھی کوئی نہیں کنارے پر

ندی کے ساتھ یہی وقت ڈوبنے کا ہے

تمہاری آنکھوں میں ٹھہرا ہوا ہے جو منظر

نیا نہیں ہے مگر پھر بھی دیکھنے کا ہے

بہت قریب سے ہر بار دیکھتا ہوں اسے

مگر سوال وہی تھوڑے فاصلے کا ہے

گزشتہ رات ذرا سا جو ہم میں باقی تھا

یہیں کہیں پہ وہ رشتہ بھی ٹوٹنے کا ہے

بہت سنبھل کے نہ چلئے کہ حادثہ ہی نہ ہو

شکیلؔ گرنا بھی دستور راستے کا ہے