kisi bhi tarh nahin tumko bhulne ka hai

kisī bhī tarh nahīñ tum ko bhūlne kā hai

zarā sā dil hai magar kitnā be-kahe kā hai

vo lahr aatī hai jaatī hai ek lamhe meñ

phir us ke baa'd hai jo kuchh vo sochne kā hai

bachāne vaalā bhī koī nahīñ kināre par

nadī ke saath yahī vaqt Dūbne kā hai

tumhārī āñkhoñ meñ Thahrā huā hai jo manzar

nayā nahīñ hai magar phir bhī dekhne kā hai

bahut qarīb se har baar dekhtā huuñ use

magar savāl vahī thoḌe fāsle kā hai

guzishta raat zarā sā jo ham meñ baaqī thā

yahīñ kahīñ pe vo rishta bhī TūTne kā hai

bahut sañbhal ke na chaliye ki hādsa hī na ho

'shakīl' girnā bhī dastūr rāste kā hai

kisi bhi tarh nahin tum ko bhulne ka hai

zara sa dil hai magar kitna be-kahe ka hai

wo lahr aati hai jati hai ek lamhe mein

phir us ke ba'd hai jo kuchh wo sochne ka hai

bachane wala bhi koi nahin kinare par

nadi ke sath yahi waqt Dubne ka hai

tumhaari aankhon mein Thahra hua hai jo manzar

naya nahin hai magar phir bhi dekhne ka hai

bahut qarib se har bar dekhta hun use

magar sawal wahi thoDe fasle ka hai

guzishta raat zara sa jo hum mein baqi tha

yahin kahin pe wo rishta bhi TuTne ka hai

bahut sanbhal ke na chaliye ki hadsa hi na ho

'shakil' girna bhi dastur raste ka hai