kisi dar pe jaane ko ji chahta hai

kisī dar pe jaane ko jī chāhtā hai

vafā āzmāne ko jī chāhtā hai

uThāyā thā jis bazm se ham ko ik din

vahīñ phir bhī jaane ko jī chāhtā hai

hue mundamil zaḳhm-e-dil mere lekin

na.e zaḳhm khāne ko jī chāhtā hai

ma.āl-e-mohabbat samajhtā huuñ phir bhī

kahīñ dil lagāne ko jī chāhtā hai

haiñ kaise maze ke tire jhūTe va.ade

ki phir dhoka khāne ko jī chāhtā hai

vo phir aaj kuchh ham se rūThe hue haiñ

unheñ phir manāne ko jī chāhtā hai

hai muddat se suunī mire dil kī mahfil

tumhīñ se sajāne ko jī chāhtā hai

jo raushan haiñ mahfil meñ aql-o-ḳhirad se

vo sham.eñ bujhāne ko jī chāhtā hai

jo so.e hue dil meñ halchal machā de

vo tūfāñ uThāne ko jī chāhtā hai

'habīb' aag bhar deñ jo siine meñ sab ke

vo naġhme sunāne ko jī chāhtā hai

kisi dar pe jaane ko ji chahta hai

wafa aazmane ko ji chahta hai

uThaya tha jis bazm se hum ko ek din

wahin phir bhi jaane ko ji chahta hai

hue mundamil zaKHm-e-dil mere lekin

nae zaKHm khane ko ji chahta hai

maal-e-mohabbat samajhta hun phir bhi

kahin dil lagane ko ji chahta hai

hain kaise maze ke tere jhuTe wade

ki phir dhoka khane ko ji chahta hai

wo phir aaj kuchh hum se ruThe hue hain

unhen phir manane ko ji chahta hai

hai muddat se suni mere dil ki mahfil

tumhin se sajaane ko ji chahta hai

jo raushan hain mahfil mein aql-o-KHirad se

wo shamen bujhane ko ji chahta hai

jo soe hue dil mein halchal macha de

wo tufan uThane ko ji chahta hai

'habib' aag bhar den jo sine mein sab ke

wo naghme sunane ko ji chahta hai