kisi dard-mand ki hun sada kisi dil-jale ki pukar hun

kisī dard-mañd kī huuñ sadā kisī dil-jale kī pukār huuñ

jo bigaḌ gayā vo nasīb huuñ jo ujaḌ ga.ī vo bahār huuñ

koī mujh pe phuul chaḌhā.e kyuuñ koī mujh pe sham.a jalā.e kyuuñ

koī mere paas bhī aa.e kyuuñ ki maiñ hasratoñ kā mazār huuñ

bhalā mujh pe Dhā.eñ to Dhā.eñ kyā sitam ab zamāne kī āñdhiyāñ

maiñ bujhā huā sā charāġh huuñ maiñ miTā huā sā ġhubār huuñ

kahūñ kyā hai kyā mirī zindagī ye hai zindagī koī zindagī

vo hai dushman-e-dil-o-jāñ mirā dil-o-jāñ se jis pe nisār huuñ

shab-o-roz lab pe hai ai 'vafā' ye duā ki maut hī de ḳhudā

jo yahī hai mere nasīb meñ ki asīr-e-dām-e-balā rahūñ

kisi dard-mand ki hun sada kisi dil-jale ki pukar hun

jo bigaD gaya wo nasib hun jo ujaD gai wo bahaar hun

koi mujh pe phul chaDhae kyun koi mujh pe shama jalae kyun

koi mere pas bhi aae kyun ki main hasraton ka mazar hun

bhala mujh pe Dhaen to Dhaen kya sitam ab zamane ki aandhiyan

main bujha hua sa charagh hun main miTa hua sa ghubar hun

kahun kya hai kya meri zindagi ye hai zindagi koi zindagi

wo hai dushman-e-dil-o-jaan mera dil-o-jaan se jis pe nisar hun

shab-o-roz lab pe hai ai 'wafa' ye dua ki maut hi de KHuda

jo yahi hai mere nasib mein ki asir-e-dam-e-bala rahun