کسی ڈھب راہ پر اب قلب دیوانہ نہیں آتا

کسی ڈھب راہ پر اب قلب دیوانہ نہیں آتا

کہ اشک آنکھوں میں ہیں اور لب پہ افسانہ نہیں آتا

نہیں سیکھا مرے غم نے خوشی میں محو ہو جانا

مرے نالوں کو نغموں میں سما جانا نہیں آتا

ہر اک ذرے کو سجدہ کر کے بھی محروم منزل ہوں

ہزاروں کعبے آئے ایک بت خانہ نہیں آتا

محبت زندگی کی جان غم جان محبت ہے

سمجھتا ہوں مگر دنیا کو سمجھانا نہیں آتا

محبت آگ ہے میں آگ میں جلتا ہوں اور خوش ہوں

مجھے غم کھا رہا ہے مجھ کو غم کھانا نہیں آتا

جگر کے داغ کیسے داغ ہیں بے نور و بے رونق

یہ شمعیں کیا ہیں جن پر کوئی پروانہ نہیں آتا

جنوں میں اہل دل کا یہ بھی اک اندازہ ہے فطرتؔ

کہ ٹھوکر کھانا آتا ہے سنبھل جانا نہیں آتا