kisi Dhab rah par ab qalb-e-diwana nahin aata

kisī Dhab raah par ab qalb-e-dīvāna nahīñ aatā

ki ashk āñkhoñ meñ haiñ aur lab pe afsāna nahīñ aatā

nahīñ sīkhā mire ġham ne ḳhushī meñ mahv ho jaanā

mire nāloñ ko naġhmoñ meñ samā jaanā nahīñ aatā

har ik zarre ko sajda kar ke bhī mahrūm-e-manzil huuñ

hazāroñ ka.abe aa.e ek but-ḳhāna nahīñ aatā

mohabbat zindagī kī jaan ġham jān-e-mohabbat hai

samajhtā huuñ magar duniyā ko samjhānā nahīñ aatā

mohabbat aag hai maiñ aag meñ jaltā huuñ aur ḳhush huuñ

mujhe ġham khā rahā hai mujh ko ġham khānā nahīñ aatā

jigar ke daaġh kaise daaġh haiñ be-nūr-o-be-raunaq

ye sham.eñ kyā haiñ jin par koī parvāna nahīñ aatā

junūñ meñ ahl-e-dil kā ye bhī ik andāza hai 'fitrat'

ki Thokar khānā aatā hai sañbhal jaanā nahīñ aatā

kisi Dhab rah par ab qalb-e-diwana nahin aata

ki ashk aankhon mein hain aur lab pe afsana nahin aata

nahin sikha mere gham ne KHushi mein mahw ho jaana

mere nalon ko naghmon mein sama jaana nahin aata

har ek zarre ko sajda kar ke bhi mahrum-e-manzil hun

hazaron kabe aae ek but-KHana nahin aata

mohabbat zindagi ki jaan gham jaan-e-mohabbat hai

samajhta hun magar duniya ko samjhana nahin aata

mohabbat aag hai main aag mein jalta hun aur KHush hun

mujhe gham kha raha hai mujh ko gham khana nahin aata

jigar ke dagh kaise dagh hain be-nur-o-be-raunaq

ye shamen kya hain jin par koi parwana nahin aata

junun mein ahl-e-dil ka ye bhi ek andaza hai 'fitrat'

ki Thokar khana aata hai sanbhal jaana nahin aata