kisi din dagh-e-gumrahi rahega un ke sar ho kar

kisī din dāġh-e-gumrāhī rahegā un ke sar ho kar

jo apnī raah chalte haiñ hamāre rāhbar ho kar

bizā.at kyā rahegī masraf-e-naqd-o-nazar ho kar

ġhanīmat hai jo koī aib rah jaa.e hunar ho kar

na.ī qaideñ baḌhīñ minnat-guzār-e-bāl-o-par ho kar

davā-e-dard-e-dil aa.ī azāb-e-dard-e-sar ho kar

sukūñ hāsil hai mujh ko bandagī meñ bhī mohabbat kī

tumheñ rāhat nahīñ miltī ḳhudā-e-sīm-o-zar ho kar

hazāroñ qahqahoñ meñ gum na ho jaa.e sadā merī

akelā kyā karūñ insāniyat par nauhagar ho kar

vo kyā jāneñ ki tevar aur haiñ ab jazba-e-dil ke

ye samjhe haiñ ki rah jā.egā kuchh din shor shar ho kar

diyā kartā hai insāñ apne dil ko bhī fareb aisā

ḳhabar sab kuchh hai aur baiThe hue ho be-ḳhabar ho kar

na pūchho dahr meñ kuchlī ga.ī hai zindagī kitnī

kahīñ be-dast-o-pā ho kar kahīñ be-bāl-o-par ho kar

kabhī azm-e-amal kī tāqatoñ meñ ḳham nahīñ aaya

dikhā.ī aañkh duniyā ne bahut zer-o-zabar ho kar

ḳhudā ma.alūm dil se kyā javāb-e-talḳh miltā hai

mohabbat kā payām aaya hai mahrūm-e-asar ho kar

nazar aa.e hamesha aib auroñ ke hunar apne

nigāhoñ ne daġhā dī ārif-e-aib-o-hunar ho kar

dil-e-pur-dard ko be-dard duniyā kyā samajhtī hai

sahegā vaar tanhā amn-e-ālam kī sipar ho kar

zamāna ho chukā bātil kī afsāna-tarāzī kā

haqīqat rang laa.ī hai navā-e-kārgar ho kar

ajal hogī vo kaisī jiine vaale sochte hoñge

ajal ko DhūñDhtā huuñ zindagī se bahra-var ho kar

na azm-e-āhanī thā jin kī qismat meñ na manzil thī

paḌe haiñ rahguzar par kushtagān-e-sīm-o-zar ho kar

harīfoñ ko mubārak ho barā.e-nām āzādī

ye aa.ī hai unhīñ ke ghar hayāt-e-muḳhtasar ho kar

hunar-mandoñ kā aapas meñ hasad ai 'najm' kyā ma.anī

hunar se dushmanī rakhte haiñ ye ahl-e-hunar ho kar

kisi din dagh-e-gumrahi rahega un ke sar ho kar

jo apni rah chalte hain hamare rahbar ho kar

bizaat kya rahegi masraf-e-naqd-o-nazar ho kar

ghanimat hai jo koi aib rah jae hunar ho kar

nai qaiden baDhin minnat-guzar-e-baal-o-par ho kar

dawa-e-dard-e-dil aai azab-e-dard-e-sar ho kar

sukun hasil hai mujh ko bandagi mein bhi mohabbat ki

tumhein rahat nahin milti KHuda-e-sim-o-zar ho kar

hazaron qahqahon mein gum na ho jae sada meri

akela kya karun insaniyat par nauhagar ho kar

wo kya jaanen ki tewar aur hain ab jazba-e-dil ke

ye samjhe hain ki rah jaega kuchh din shor shar ho kar

diya karta hai insan apne dil ko bhi fareb aisa

KHabar sab kuchh hai aur baiThe hue ho be-KHabar ho kar

na puchho dahr mein kuchli gai hai zindagi kitni

kahin be-dast-o-pa ho kar kahin be-baal-o-par ho kar

kabhi azm-e-amal ki taqaton mein KHam nahin aaya

dikhai aankh duniya ne bahut zer-o-zabar ho kar

KHuda malum dil se kya jawab-e-talKH milta hai

mohabbat ka payam aaya hai mahrum-e-asar ho kar

nazar aae hamesha aib auron ke hunar apne

nigahon ne dagha di aarif-e-aib-o-hunar ho kar

dil-e-pur-dard ko be-dard duniya kya samajhti hai

sahega war tanha amn-e-alam ki sipar ho kar

zamana ho chuka baatil ki afsana-taraazi ka

haqiqat rang lai hai nawa-e-kargar ho kar

ajal hogi wo kaisi jine wale sochte honge

ajal ko DhunDhta hun zindagi se bahra-war ho kar

na azm-e-ahani tha jin ki qismat mein na manzil thi

paDe hain rahguzar par kushtagan-e-sim-o-zar ho kar

harifon ko mubarak ho barae-nam aazadi

ye aai hai unhin ke ghar hayat-e-muKHtasar ho kar

hunar-mandon ka aapas mein hasad ai 'najm' kya mani

hunar se dushmani rakhte hain ye ahl-e-hunar ho kar