کسی دن گھر مرے آیا تو ہوتا

کسی دن گھر مرے آیا تو ہوتا

تلطف مجھ پہ فرمایا تو ہوتا

ذرا زلفوں کو دکھلایا تو ہوتا

بلا سر پر مرے لایا تو ہوتا

عیادت کو اگر آیا نہیں وہ

جنازے پر مرے آیا تو ہوتا

گل خوبی چمن میں مسکرا کر

ذرا غنچہ کو شرمایا تو ہوتا

بلا کر کان کی بجلی کو اپنے

کبھی بجلی کو چمکایا تو ہوتا

وفا پر بھی جفائیں کر رہا ہے

ارے ظالم تو پچھتایا تو ہوتا

گلستاں میں کسی دن دل پہ بلبل

مرے مانند گل کھایا تو ہوتا

مرے لاشے کو اے رشک مسیحا

ذرا قم کہہ کے ٹھکرایا تو ہوتا

ترے خنجرؔ سے قاتل میرے مانند

کسی نے سر کو کٹوایا تو ہوتا