kisi gum-karda-e-manzil ne hi pahre pe rakkhi hai

kisī gum-karda-e-manzil ne hī pahre pe rakkhī hai

vo ik zinda lahū kī buuñd jo kāñTe pe rakkhī hai

jo qātil haiñ vo sab mahfūz haiñ apne Thikānoñ meñ

magar ik be-sahārā laash chaurāhe pe rakkhī hai

mire zaḳhmoñ ko marham kī tamanna tum se kyā hogī

ki tum ne pyaar kī buniyād hī badle meñ rakkhī hai

gharoñ kī aag ham se bujh nahīñ saktī magar ḳhush haiñ

ki ham ne saarī zimmedārī hamsā.e pe rakkhī hai

kisi gum-karda-e-manzil ne hi pahre pe rakkhi hai

wo ek zinda lahu ki bund jo kanTe pe rakkhi hai

jo qatil hain wo sab mahfuz hain apne Thikanon mein

magar ek be-sahaara lash chaurahe pe rakkhi hai

mere zaKHmon ko marham ki tamanna tum se kya hogi

ki tum ne pyar ki buniyaad hi badle mein rakkhi hai

gharon ki aag hum se bujh nahin sakti magar KHush hain

ki hum ne sari zimmedari hamsae pe rakkhi hai