kisi guman-o-yaqin ki had mein wo shoKH-e-parda-nashin nahin hai

kisī gumān-o-yaqīñ kī had meñ vo shoḳh-e-parda-nashīñ nahīñ hai

jahāñ na samho usī jagah hai jahāñ samajh lo vahīñ nahīñ hai

tumhārā va.ada hai kaisā va.ada ki jis kā dil ko yaqīñ nahīñ hai

nagīn-e-be-naqsh to hazāroñ ye naqsh hai aur nagīñ nahīñ hai

tasavvuroñ ke fareb uThā kar mushāhida vahm ban rahā hai

nazar ne khaa.e haiñ itne dhoke ki dekh kar bhī yaqīñ nahīñ hai

talavvun ik jazr-o-mad hai ḳhud hī thapeḌoñ meñ aa phañsī hai kashtī

ḳhabar hai muddat ke Duube dil kī ki aaj tak tah-nashīñ nahīñ hai

ye kahtī hai gardish-e-zamāna qadam thameñge na ab kisī jā

hai ye bhī ik āsmāñ kā TukḌā tirī galī kī zamīñ nahīñ hai

vafā kī haamī hamiyyat un kī harīf-e-ummīd ġhairat un kī

nigāheñ iqrār kar rahī haiñ zabāñ pe lekin nahīñ nahīñ hai

huā jo ik dil kā daaġh raushan to ho ga.e kul charāġh raushan

ḳhayāl raushan dimāġh raushan bas ab añdherā kahīñ nahīñ hai

sarishk-e-ḳhūnīñ kā kul fasāna lapeT rakhā hai ik varaq meñ

nichoḌne par lahū na Tapke to āstīñ āstīñ nahīñ hai

hamārī nākāmī-e-vafā ne zamāne kī khol dī haiñ āñkheñ

charāġh kab kā bujhā paḌā hai magar añdherā kahīñ nahīñ hai

mujhī pe kyā hai nahīñ hai kis meñ ye but-tarāshī ye but-parastī

agar na husn-e-nazar se dekho to koī bhī phir hasīñ nahīñ hai

rah-e-itā.at meñ 'ārzū' ne qadam qadam pe kiye haiñ sajde

jo aap kā naqsh-e-pā nahīñ hai vo us kā naqsh-e-jabīñ nahīñ hai

kisi guman-o-yaqin ki had mein wo shoKH-e-parda-nashin nahin hai

jahan na samho usi jagah hai jahan samajh lo wahin nahin hai

tumhaara wada hai kaisa wada ki jis ka dil ko yaqin nahin hai

nagin-e-be-naqsh to hazaron ye naqsh hai aur nagin nahin hai

tasawwuron ke fareb uTha kar mushahida wahm ban raha hai

nazar ne khae hain itne dhoke ki dekh kar bhi yaqin nahin hai

talawwun ek jazr-o-mad hai KHud hi thapeDon mein aa phansi hai kashti

KHabar hai muddat ke Dube dil ki ki aaj tak tah-nashin nahin hai

ye kahti hai gardish-e-zamana qadam thamenge na ab kisi ja

hai ye bhi ek aasman ka TukDa teri gali ki zamin nahin hai

wafa ki hami hamiyyat un ki harif-e-ummid ghairat un ki

nigahen iqrar kar rahi hain zaban pe lekin nahin nahin hai

hua jo ek dil ka dagh raushan to ho gae kul charagh raushan

KHayal raushan dimagh raushan bas ab andhera kahin nahin hai

sarishk-e-KHunin ka kul fasana lapeT rakha hai ek waraq mein

nichoDne par lahu na Tapke to aastin aastin nahin hai

hamari nakaami-e-wafa ne zamane ki khol di hain aankhen

charagh kab ka bujha paDa hai magar andhera kahin nahin hai

mujhi pe kya hai nahin hai kis mein ye but-tarashi ye but-parasti

agar na husn-e-nazar se dekho to koi bhi phir hasin nahin hai

rah-e-itaat mein 'arzu' ne qadam qadam pe kiye hain sajde

jo aap ka naqsh-e-pa nahin hai wo us ka naqsh-e-jabin nahin hai