kisi hasrat-zada ne KHud-kushi manzur ki dil se

kisī hasrat-zada ne ḳhud-kushī manzūr kī dil se

sadā labbaik kī sun kar zamīn-e-kū-e-qātil se

ḳhudā ke vāste dam bhar to ai bād-e-ajal tham jā

ki le luuñ kuchh havā maiñ dāman-e-shamshīr-e-qātil se

Thaharnā o dil-e-betāb phir tū bhī to siine meñ

nikal aa.e taḌap kar mauj jab āġhosh-e-sāhil se

zamīñ se āsmāñ tak merī betābī kā charchā hai

sabaq letī hai bijlī aa ke mere qalb-e-bismil se

koī tadbīr socho taaki dil aa jaa.e qaabū meñ

kahīñ maiñ qaid ho saktā huuñ in tauq-o-salāsil se

abhī dekho to merī mashq kis had tak pahuñchtī hai

banā lūñgā kabhī tum ko bhī apnā jazb-e-kāmil se

girā thā qatra-e-avval jo mere ḳhūn-e-nāhaq se

uThī thī surḳh ik āñdhī zamīn-e-kū-e-qātil se

vo ab aate hī hoñge aur yaañ par aa ke baiTheñge

ḳhudāvandā ye bāteñ kab talak 'ālim' kare dil se

kisi hasrat-zada ne KHud-kushi manzur ki dil se

sada labbaik ki sun kar zamin-e-ku-e-qatil se

KHuda ke waste dam bhar to ai baad-e-ajal tham ja

ki le lun kuchh hawa main daman-e-shamshir-e-qatil se

Thaharna o dil-e-betab phir tu bhi to sine mein

nikal aae taDap kar mauj jab aaghosh-e-sahil se

zamin se aasman tak meri betabi ka charcha hai

sabaq leti hai bijli aa ke mere qalb-e-bismil se

koi tadbir socho taki dil aa jae qabu mein

kahin main qaid ho sakta hun in tauq-o-salasil se

abhi dekho to meri mashq kis had tak pahunchti hai

bana lunga kabhi tum ko bhi apna jazb-e-kaamil se

gira tha qatra-e-awwal jo mere KHun-e-nahaq se

uThi thi surKH ek aandhi zamin-e-ku-e-qatil se

wo ab aate hi honge aur yan par aa ke baiThenge

KHudawanda ye baaten kab talak 'alim' kare dil se