kisi ka aahang kaif-za hai kisi ka lahja gulu-girafta

kisī kā āhang kaif-zā hai kisī kā lahja gulū-girafta

ba-qadr-e-irfān zindagī hai har ek dil ārzū-girafta

ye kaisī tasvīr-e-zindagī hai jo safha-e-dahr par khiñchī hai

sitam kā ḳhanjar hai zer-e-dāmāñ to āstīñ hai lahū-girafta

musāfir-e-kū-ba-kū kā yaaro nahīñ koī mustaqil Thikāna

hayāt hai aarzū kī maarī mazāq hai justujū-girafta

kisī kī duniyā ujaḌ chukī hai nasīb ko ro rahā hai koī

kisī kā gulshan harā bharā hai koī hai zauq-e-numū-girafta

libās-andar-libās rah kar nazar meñ jo be-libās Thahre

badan churā.e to kis tarah se vo mahvash-e-ābrū-girafta

kabhī bhī is par ḳhizāñ kā saaya na paḌ sakā hai na paḌ sakegā

ġhazal vo bāġh-e-suḳhan hai jis kī bahār hai rang-o-bū-girafta

nigāh-e-sāqī kī ek jumbish hai laakh taskīn-e-dil kā sāmāñ

'sabā' vo ehsās-e-tishnagī hai kabhī na ho jo subū-girafta

kisi ka aahang kaif-za hai kisi ka lahja gulu-girafta

ba-qadr-e-irfan zindagi hai har ek dil aarzu-girafta

ye kaisi taswir-e-zindagi hai jo safha-e-dahr par khinchi hai

sitam ka KHanjar hai zer-e-daman to aastin hai lahu-girafta

musafir-e-ku-ba-ku ka yaro nahin koi mustaqil Thikana

hayat hai aarzu ki mari mazaq hai justuju-girafta

kisi ki duniya ujaD chuki hai nasib ko ro raha hai koi

kisi ka gulshan hara bhara hai koi hai zauq-e-numu-girafta

libas-andar-libas rah kar nazar mein jo be-libas Thahre

badan churae to kis tarah se wo mahwash-e-abru-girafta

kabhi bhi is par KHizan ka saya na paD saka hai na paD sakega

ghazal wo bagh-e-suKHan hai jis ki bahaar hai rang-o-bu-girafta

nigah-e-saqi ki ek jumbish hai lakh taskin-e-dil ka saman

'saba' wo ehsas-e-tishnagi hai kabhi na ho jo subu-girafta