kisi ka jhuTa kisi ka sachcha KHayal laDki

kisī kā jhūTā kisī kā sachchā ḳhayāl laḌkī

tumhīñ ho yā'nī ki vaj.h-e-hijr-o-visāl laḌkī

hai 'ishq tum se yahī kahā hai yahī kaheñge

jo bārhā bhī karogī ham se savāl laḌkī

paḌe haiñ phīke ye chāñd taare bhī is ke aage

kahāñ se laa.ī ho tum ye husn-o-jamāl laḌkī

hai raah mushkil tumheñ magar hārnā nahīñ hai

yaqīn jaano banogī ik din misāl laḌkī

bulandiyoñ par zarā takabbur se duur rahnā

vagarna ye hī banegā vaj.h-e-zavāl laḌkī

tumheñ patā hai hamāre dil meñ tumhāre jaisī

tavīl 'arse se rahtī hai ik ġhazāl laḌkī

agar kabhī ham bichhaḌ ga.e to tumheñ bhī hogā

batāo nā kyā koī bhī ġham yā malāl laḌkī

'asad' ne tum par ġhazal mukammal utaar to dī

ye dekh lenā ki ho na jaa.e vabāl laḌkī

kisi ka jhuTa kisi ka sachcha KHayal laDki

tumhin ho ya'ni ki wajh-e-hijr-o-visal laDki

hai 'ishq tum se yahi kaha hai yahi kahenge

jo barha bhi karogi hum se sawal laDki

paDe hain phike ye chand tare bhi is ke aage

kahan se lai ho tum ye husn-o-jamal laDki

hai rah mushkil tumhein magar haarna nahin hai

yaqin jaano banogi ek din misal laDki

bulandiyon par zara takabbur se dur rahna

wagarna ye hi banega wajh-e-zawal laDki

tumhein pata hai hamare dil mein tumhaare jaisi

tawil 'arse se rahti hai ek ghazal laDki

agar kabhi hum bichhaD gae to tumhein bhi hoga

batao na kya koi bhi gham ya malal laDki

'asad' ne tum par ghazal mukammal utar to di

ye dekh lena ki ho na jae wabaal laDki