kisi ka nam bhi lete nahin hain diwane

kisī kā naam bhī lete nahīñ haiñ dīvāne

jo rāzdār the vo bhī hue haiñ begāne

agarche sharh zamāne ne kī bahut ġham kī

magar jo raaz hai merā vo koī kyā jaane

samajh rahe haiñ use sab nashāt kī bāteñ

kahā sabā ne jo ġhunchoñ se koī kyā jaane

na ho sakegī mukammal kabhī hikāyat-e-dil

zamāna yuuñ to kahegā hazār afsāne

vahī haiñ asl-o-haqīqat meñ rū-kash-e-jannat

tumhārī yaad se ābād haiñ jo ġham-ḳhāne

ye kaise rind kī tauba kā hai asar 'sāqib'

sharāb-ḳhāne meñ TuuTe paḌe haiñ paimāne

kisi ka nam bhi lete nahin hain diwane

jo raazdar the wo bhi hue hain begane

agarche sharh zamane ne ki bahut gham ki

magar jo raaz hai mera wo koi kya jaane

samajh rahe hain use sab nashat ki baaten

kaha saba ne jo ghunchon se koi kya jaane

na ho sakegi mukammal kabhi hikayat-e-dil

zamana yun to kahega hazar afsane

wahi hain asl-o-haqiqat mein ru-kash-e-jannat

tumhaari yaad se aabaad hain jo gham-KHane

ye kaise rind ki tauba ka hai asar 'saqib'

sharab-KHane mein TuTe paDe hain paimane