کسی کا نام بھی لیتے نہیں ہیں دیوانے

کسی کا نام بھی لیتے نہیں ہیں دیوانے

جو رازدار تھے وہ بھی ہوئے ہیں بیگانے

اگرچہ شرح زمانے نے کی بہت غم کی

مگر جو راز ہے میرا وہ کوئی کیا جانے

سمجھ رہے ہیں اسے سب نشاط کی باتیں

کہا صبا نے جو غنچوں سے کوئی کیا جانے

نہ ہو سکے گی مکمل کبھی حکایت دل

زمانہ یوں تو کہے گا ہزار افسانے

وہی ہیں اصل و حقیقت میں روکش جنت

تمہاری یاد سے آباد ہیں جو غم خانے

یہ کیسے رند کی توبہ کا ہے اثر ثاقبؔ

شراب خانے میں ٹوٹے پڑے ہیں پیمانے