kisi ka nam lo be-nam afsane bahut se hain

kisī kā naam lo be-nām afsāne bahut se haiñ

na jaane kis ko tum kahte ho dīvāne bahut se haiñ

jafāoñ ke gile tum se ḳhudā jaane bahut se haiñ

magar mahshar kā din hai apne begāne bahut se haiñ

banā.e de rahī haiñ ajnabī nādāriyāñ mujh ko

tirī mahfil meñ varna jāne-pahchāne bahut se haiñ

dharī rah jā.egī pābandī-e-zindāñ jo ab chheḌā

ye darbānoñ ko samjhā do ki dīvāne bahut se haiñ

bas ab so jaao niiñd āñkhoñ meñ hai kal phir sunā.eñge

zarā sī rah ga.ī hai raat afsāne bahut se haiñ

tumheñ kis ne bulāyā mai-kashoñ se ye na kah saaqī

tabī.at mil ga.ī hai varna maiḳhāne bahut se haiñ

baḌī qurbāniyoñ ke ba.ad rahnā baaġh meñ hogā

abhī to āshiyāñ bijlī se jalvāne bahut se haiñ

likhī hai ḳhaak uḌānī hī agar apne muqaddar meñ

tire kūche pe kyā mauqūf vīrāne bahut se haiñ

na ro ai sham.a maujūda patañgoñ kī musībat par

abhī mahfil se bāhar tere parvāne bahut se haiñ

mire kahne se hogī tark-e-rasm-o-rāh ġhairoñ se

bajā hai aap ne kahne mire maane bahut se haiñ

'qamar' allāh saath īmān ke manzil pe pahuñchā de

haram kī raah meñ sunte haiñ but-ḳhāne bahut se haiñ

kisi ka nam lo be-nam afsane bahut se hain

na jaane kis ko tum kahte ho diwane bahut se hain

jafaon ke gile tum se KHuda jaane bahut se hain

magar mahshar ka din hai apne begane bahut se hain

banae de rahi hain ajnabi nadariyan mujh ko

teri mahfil mein warna jaane-pahchane bahut se hain

dhari rah jaegi pabandi-e-zindan jo ab chheDa

ye darbanon ko samjha do ki diwane bahut se hain

bas ab so jao nind aankhon mein hai kal phir sunaenge

zara si rah gai hai raat afsane bahut se hain

tumhein kis ne bulaya mai-kashon se ye na kah saqi

tabiat mil gai hai warna maiKHane bahut se hain

baDi qurbaniyon ke baad rahna bagh mein hoga

abhi to aashiyan bijli se jalwane bahut se hain

likhi hai KHak uDani hi agar apne muqaddar mein

tere kuche pe kya mauquf virane bahut se hain

na ro ai shama maujuda patangon ki musibat par

abhi mahfil se bahar tere parwane bahut se hain

mere kahne se hogi tark-e-rasm-o-rah ghairon se

baja hai aap ne kahne mere mane bahut se hain

'qamar' allah sath iman ke manzil pe pahuncha de

haram ki rah mein sunte hain but-KHane bahut se hain