کسی کے بارے میں دن رات سوچنا کیا ہے

کسی کے بارے میں دن رات سوچنا کیا ہے

جو عشق کرنا ہے کر ڈالو مسئلہ کیا ہے

کسے پتہ ہے محبت کی انتہا کیا ہے

غم حیات سے خوشیوں کا رابطہ کیا ہے

میں مطمئن ہوں جو خود سے تو پھر برا کیا ہے

کسی بھی شخص سے میرا مقابلہ کیا ہے

جو اپنی ذات سے واقف نہ ہو سکا اب تک

اسے جہاں کے متعلق ابھی پتہ کیا ہے

جو خود نمائی کا طالب ہو اس سے کیا ملنا

اسے حیات کے بارے میں تجربہ کیا ہے

ذرا سی دیر خلا میں طواف کرنے دو

ذرا پتہ تو چلے اس کا دائرہ کیا ہے

یقین کرنا ہی ہوگا مجھے مقدر پر

وگرنہ اس کے سوا اور راستہ کیا ہے

خود اپنے آپ سے لگنے لگا ہے ڈر مجھ کو

کوئی بتائے تو آخر مجھے ہوا کیا ہے

یہ ترجمہ ہی ہے اگیاتؔ میرے جیون کا

یہ شاعری مرے احساس کے سوا کیا ہے