kisi ke bare mein din-raat sochna kya hai

kisī ke baare meñ din-rāt sochnā kyā hai

jo ishq karnā hai kar Daalo mas.ala kyā hai

kise pata hai mohabbat kī intihā kyā hai

ġham-e-hayāt se ḳhushiyoñ kā rābta kyā hai

maiñ mutma.in huuñ jo ḳhud se to phir burā kyā hai

kisī bhī shaḳhs se merā muqābla kyā hai

jo apnī zaat se vāqif na ho sakā ab tak

use jahāñ ke muta.alliq abhī pata kyā hai

jo ḳhud-numā.ī kā tālib ho us se kyā milnā

use hayāt ke baare meñ tajraba kyā hai

zarā sī der ḳhalā meñ tavāf karne do

zarā pata to chale us kā dā.era kyā hai

yaqīn karnā hī hogā mujhe muqaddar par

vagarna is ke sivā aur rāsta kyā hai

ḳhud apne aap se lagne lagā hai Dar mujh ko

koī batā.e to āḳhir mujhe huā kyā hai

ye tarjuma hī hai 'agyāt' mere jīvan kā

ye shā.erī mire ehsās ke sivā kyā hai

kisi ke bare mein din-raat sochna kya hai

jo ishq karna hai kar Dalo masala kya hai

kise pata hai mohabbat ki intiha kya hai

gham-e-hayat se KHushiyon ka rabta kya hai

main mutmain hun jo KHud se to phir bura kya hai

kisi bhi shaKHs se mera muqabla kya hai

jo apni zat se waqif na ho saka ab tak

use jahan ke mutalliq abhi pata kya hai

jo KHud-numai ka talib ho us se kya milna

use hayat ke bare mein tajraba kya hai

zara si der KHala mein tawaf karne do

zara pata to chale us ka daera kya hai

yaqin karna hi hoga mujhe muqaddar par

wagarna is ke siwa aur rasta kya hai

KHud apne aap se lagne laga hai Dar mujh ko

koi batae to aaKHir mujhe hua kya hai

ye tarjuma hi hai 'agyat' mere jiwan ka

ye shaeri mere ehsas ke siwa kya hai