kisi ke gham ko gale se lagae baiThe hain

kisī ke ġham ko gale se lagā.e baiThe haiñ

ham apne saare ġhamoñ ko bhulā.e baiThe haiñ

sukūn-e-dil ke liye aaj tere dīvāne

tire ḳhayāl kī duniyā sajā.e baiThe haiñ

syaah raat hai vo aa.eñ to ujālā rahe

isī ummīd pe sham.eñ jalā.e baiThe haiñ

kahāñ se laa.eñ vo tinke chuneñ to kis ke liye

jo ḳhud hī apnā nasheman jalā.e baiThe haiñ

ab un kī samt bhī ho jaa.e kaash nazar-e-karam

jo log der se mahfil meñ aa.e baiThe haiñ

kareñ to kis pe kareñ e.atibār ai 'rāhī'

har ek dost ko ham āzmā.e baiThe haiñ

kisi ke gham ko gale se lagae baiThe hain

hum apne sare ghamon ko bhulae baiThe hain

sukun-e-dil ke liye aaj tere diwane

tere KHayal ki duniya sajae baiThe hain

syah raat hai wo aaen to ujala rahe

isi ummid pe shamen jalae baiThe hain

kahan se laen wo tinke chunen to kis ke liye

jo KHud hi apna nasheman jalae baiThe hain

ab un ki samt bhi ho jae kash nazar-e-karam

jo log der se mahfil mein aae baiThe hain

karen to kis pe karen eatibar ai 'rahi'

har ek dost ko hum aazmae baiThe hain