کسی کے گیسو پرپیچ پر دل دار بیٹھے ہیں

کسی کے گیسو پرپیچ پر دل دار بیٹھے ہیں

وہ اب کیا جیت سکتے ہیں جو بازی ہار بیٹھے ہیں

اسیران قفس کا حال اب دیکھا نہیں جاتا

تھکے ہیں پھڑپھڑا کر جان سے بیزار بیٹھے ہیں

دل آشفتہ دے دیں اب کسی کو جی میں آتا ہے

کہ اس کی بے خودی سے ہو کے ہم بیزار بیٹھے ہیں

خدارا اک نگاہ ناز ہی سے دیکھ لو ہم کو

گریباں پھاڑنے کو آج ہم تیار بیٹھے ہیں

کہاں باقی رہا وحشت میں شغل بے خودی کوئی

اڑا کر دھجیاں جامے کی ہم بے کار بیٹھے ہیں

کسی کی بزم میں بے خوف پھر جاتے ہیں غم کھانے

وہ ہوں گے اور چھپ کر جو پس دیوار بیٹھے ہیں

یکایک اپنی امیدوں کی دنیا لٹ گئی ساری

نظر پھرتے ہی ان کی ہم سے سب بیزار بیٹھے ہیں

تجھے ساقی ہے صدمہ آج پھر سے اپنی آنکھوں کا

دلوں کے جام خالی کر کے سب مے خوار بیٹھے ہیں

اٹھیں گے یہ جبھی جب خود قضا آ کر اٹھائے گی

جو اس کوچے میں زیر سایۂ دیوار بیٹھے ہیں

ہمیں پروا نہیں ساقی ذرا بھی جام و مینا کی

کسی کی چشم میگوں دیکھ کر سرشار بیٹھے ہیں

بھلا کیوں کر رکھے پھر ان سے امید وفا کوئی

حسینان جہاں جب درپئے آزار بیٹھے ہیں

شب فرقت کہاں ہے چین ان آفت کے ماروں کو

یوں ہی تھامے کلیجہ آپ کے بیمار بیٹھے ہیں

دل مشتاق کہتا ہے چلو اب فیصلہ کر لیں

یہ سنتے ہیں کہ وہ کھینچے ہوئے تلوار بیٹھے ہیں