kisi ke husn ki jalwagari ne mujhko luTa hai

kisī ke husn kī jalvagarī ne mujh ko luuTā hai

zamīñ ke chāñd kī raḳhshandagī ne mujh ko luuTā hai

kabhī maiñ naam le ke us ko rusvā kar nahīñ saktā

samajh lo ye ki zinda shā'irī ne mujh ko luuTā hai

maiñ us ko jism pahnā.ūñ to hogī vo sitamgar sī

safar meñ ziist ke jis āgahī ne mujh ko luuTā hai

na koī ham-safar merā na koī rāhbar merā

baḌe ārām se āvārgī ne mujh ko luuTā hai

bhaTaktā phir rahā huuñ maiñ tamannāoñ kī duniyā meñ

ġhazab hai har qadam par zindagī ne mujh ko luuTā hai

udhar tum ho ki sub.h-e-karr-o-far hai mehrbāñ tum par

idhar maiñ huuñ ki shām-e-bekasī ne mujh ko luuTā hai

ai charḳh-e-nīlgūñ sach-much koī hairat nahīñ mujh ko

farishta ban ke jo ik aadmī ne mujh ko luuTā hai

sitāro mujh se us kā tazkira kyoñ karte rahte ho

tumheñ mā'lūm hai jab chāñdnī ne mujh ko luuTā hai

lab-e-iz.hār vā kar ke paḌā hai koī zindāñ meñ

mujhe dekho ki jabr-e-ḳhāmushī ne mujh ko luuTā hai

kisī ke ġham pe ik din muskurāyā thā haqārat se

kahūñ kyā kis tarah merī ḳhushī ne mujh ko luuTā hai

maiñ ik maġhrūr dariyā thā chalo achchhā huā 'zāhid'

baḌī shā.istagī se ik nadī ne mujh ko luuTā hai

kisi ke husn ki jalwagari ne mujh ko luTa hai

zamin ke chand ki raKHshandagi ne mujh ko luTa hai

kabhi main nam le ke us ko ruswa kar nahin sakta

samajh lo ye ki zinda sha'iri ne mujh ko luTa hai

main us ko jism pahnaun to hogi wo sitamgar si

safar mein zist ke jis aagahi ne mujh ko luTa hai

na koi ham-safar mera na koi rahbar mera

baDe aaram se aawargi ne mujh ko luTa hai

bhaTakta phir raha hun main tamannaon ki duniya mein

ghazab hai har qadam par zindagi ne mujh ko luTa hai

udhar tum ho ki subh-e-karr-o-far hai mehrban tum par

idhar main hun ki sham-e-bekasi ne mujh ko luTa hai

ai charKH-e-nilgun sach-much koi hairat nahin mujh ko

farishta ban ke jo ek aadmi ne mujh ko luTa hai

sitaro mujh se us ka tazkira kyon karte rahte ho

tumhein ma'lum hai jab chandni ne mujh ko luTa hai

lab-e-izhaar wa kar ke paDa hai koi zindan mein

mujhe dekho ki jabr-e-KHamushi ne mujh ko luTa hai

kisi ke gham pe ek din muskuraya tha haqarat se

kahun kya kis tarah meri KHushi ne mujh ko luTa hai

main ek maghrur dariya tha chalo achchha hua 'zahid'

baDi shaistagi se ek nadi ne mujh ko luTa hai