کسی کے حسن و ادا پر جو تبصرہ کیجے

کسی کے حسن و ادا پر جو تبصرہ کیجے

فلک اساس ارادوں سے ابتدا کیجے

کوئی تو حد ہو مقرر ستم گری کی تری

اگرچہ صبر جو کیجے بھی تا کجا کیجے

قرار دل کا نہاں ہے اسی میں جاناناں

ہماری سمت بھی چشم ستم ذرا کیجے

اسیر پنجۂ مژگاں ہیں جانے کب سے ہم

ہمارے درد جگر کا معالجہ کیجے

مجھے خبر ہے مری دسترس نہیں اس تک

مگر اسے ہی یہ دل چاہتا ہے کیا کیجے

یہ ٹوٹ کر جو بکھرنے کی چاہ رکھتا ہے

کبھی تو پوری تمنائے آئنہ کیجے

نیا نہیں ہے دلوں کا یہ ٹوٹنا عارفؔ

میں کہہ رہا ہوں ذرا سا تو حوصلہ کیجے