kisi ke ishq mein kya kya na main KHarab raha

kisī ke ishq meñ kyā kyā na maiñ ḳharāb rahā

balā meñ jaan rahī jab talak shabāb rahā

ajab rasā hai muqaddar shab-e-visāl us kā

jo terī zulf ke saa.e meñ mahv-e-ḳhvāb rahā

kisī ne saath mirā rāh-e-ishq meñ na diyā

bas ek dard magar mere ham-rikāb rahā

ishāra hai yahī rindoñ se chashm-e-sāqī kā

jo mai-kade se phirā umr bhar ḳharāb rahā

naqāb Daal ke aa.e vo merī turbat par

fanā ke baad bhī mujh se vahī hijāb rahā

guzar ga.ī shab-e-vasl aur baat tak bhī na kī

idhar ḳhayāl-e-adab aur udhar hijāb rahā

fusūn-e-nargis-e-mastāna se tire saaqī

mudām mai se bharā sāġhar-e-sharāb rahā

kisī kī zulf-e-girah-gīr thī magar barham

tamām raat mire dil meñ pech-o-tāb rahā

ḳhayāl-e-zulf meñ uljhā kiyā 'valī' tā-zīst

balā ke pech meñ vo ḳhānumāñ-ḳharāb rahā

kisi ke ishq mein kya kya na main KHarab raha

bala mein jaan rahi jab talak shabab raha

ajab rasa hai muqaddar shab-e-visal us ka

jo teri zulf ke sae mein mahw-e-KHwab raha

kisi ne sath mera rah-e-ishq mein na diya

bas ek dard magar mere ham-rikab raha

ishaara hai yahi rindon se chashm-e-saqi ka

jo mai-kade se phira umr bhar KHarab raha

naqab Dal ke aae wo meri turbat par

fana ke baad bhi mujh se wahi hijab raha

guzar gai shab-e-wasl aur baat tak bhi na ki

idhar KHayal-e-adab aur udhar hijab raha

fusun-e-nargis-e-mastana se tere saqi

mudam mai se bhara saghar-e-sharab raha

kisi ki zulf-e-girah-gir thi magar barham

tamam raat mere dil mein pech-o-tab raha

KHayal-e-zulf mein uljha kiya 'wali' ta-zist

bala ke pech mein wo KHanuman-KHarab raha