کسی کے عشق میں یہ کام کرنا چاہتے ہیں

کسی کے عشق میں یہ کام کرنا چاہتے ہیں

ہم آسمان پہ اب پاؤں دھرنا چاہتے ہیں

سمٹنا چاہتی ہے رات میری آنکھوں میں

ستارے میرے بدن میں اترنا چاہتے ہیں

ہمیں تو راس نہ آیا یہ انتشار اپنا

ذرا سمیٹ لیں خود کو تو مرنا چاہتے ہیں

نکل کے دیکھ ذرا حجرۂ تغافل سے

تری گلی سے مسافر گزرنا چاہتے ہیں

جنہیں کسی کی نگاہوں نے باندھ رکھا تھا

اب اس طلسم کے لمحے بکھرنا چاہتے ہیں

بھٹک رہے ہیں ان آنکھوں کے شہر میں کب سے

سرائے خواب میں اک دن ٹھہرنا چاہتے ہیں