kisi ke ranj-o-gham mein jo bashar shamil nahin hota

kisī ke ranj-o-ġham meñ jo bashar shāmil nahīñ hotā

vo duniyā meñ kabhī tāzīm ke qābil nahīñ hotā

marīz-e-ishq se ai chārāgar ye be-ruḳhī kaisī

kisī bebas kā dil rakhnā koī mushkil nahīñ hotā

nihāyat be-maza hotī hai vo rūdād ulfat kī

tumhārā zikr jis rūdād meñ shāmil nahīñ hotā

koī pūchhe mire dil se zarā mahfil kī vīrānī

kabhī mahfil meñ jab vo raunaq-e-mahfil nahīñ hotā

haqīqat meñ unhīñ ko zindagānī raas aatī hai

vo jin ke vāste marnā koī mushkil nahīñ hotā

sulūk-e-dahr kā shikva kabhī karte nahīñ varna

sulūk-e-dahr se ġhāfil hamārā dil nahīñ hotā

mohabbat kī koī manzil nahīñ hotī zamāne meñ

ye vo dariyā hai jis kā koī bhī sāhil nahīñ hotā

tirī bātoñ pe ai nāseh yaqīñ ham kis tarah kar leñ

ye vo bāteñ haiñ jin bātoñ se kuchh hāsil nahīñ hotā

faqat saaqī kā dil rakhne ko pī letā huuñ ai 'āsī'

kisī sūrat meñ varna shāmil-e-mahfil nahīñ hotā

kisi ke ranj-o-gham mein jo bashar shamil nahin hota

wo duniya mein kabhi tazim ke qabil nahin hota

mariz-e-ishq se ai chaaragar ye be-ruKHi kaisi

kisi bebas ka dil rakhna koi mushkil nahin hota

nihayat be-maza hoti hai wo rudad ulfat ki

tumhaara zikr jis rudad mein shamil nahin hota

koi puchhe mere dil se zara mahfil ki virani

kabhi mahfil mein jab wo raunaq-e-mahfil nahin hota

haqiqat mein unhin ko zindagani ras aati hai

wo jin ke waste marna koi mushkil nahin hota

suluk-e-dahr ka shikwa kabhi karte nahin warna

suluk-e-dahr se ghafil hamara dil nahin hota

mohabbat ki koi manzil nahin hoti zamane mein

ye wo dariya hai jis ka koi bhi sahil nahin hota

teri baaton pe ai naseh yaqin hum kis tarah kar len

ye wo baaten hain jin baaton se kuchh hasil nahin hota

faqat saqi ka dil rakhne ko pi leta hun ai 'asi'

kisi surat mein warna shamil-e-mahfil nahin hota