kisi ke sath dene ka koi imkan nahin hota

kisī ke saath dene kā koī imkāñ nahīñ hotā

vasī-ul-qalb honā is qadar āsāñ nahīñ hotā

bichhaḌte vaqt ik aañsū pas-e-mizhgāñ nahīñ hotā

magar ye hausla is dard kā darmāñ nahīñ hotā

judā.ī kā ta.assur mujh pe kuchh hai aap par kuchh hai

asar har baat kā har shaḳhs par yaksāñ nahīñ hotā

mirā dil apne hī ehsās kī shiddat gañvā baiThā

tumhārī baat kā afsos ab chandāñ nahīñ hotā

tazād apnī tabī.at kā mizāj us kī mohabbat kā

har andesha ba-vaj.h-e-gardish-e-daurāñ nahīñ hotā

samundar kī taheñ aur āsmāñ kī sab hadeñ chhū leñ

magar insāñ ko apnī zaat kā irfāñ nahīñ hotā

'nasīm' apne liye tum ne duā bhī tark kar Daalī

to kyā ab ḳhud se milne kā tumheñ armāñ nahīñ hotā

kisi ke sath dene ka koi imkan nahin hota

wasi-ul-qalb hona is qadar aasan nahin hota

bichhaDte waqt ek aansu pas-e-mizhgan nahin hota

magar ye hausla is dard ka darman nahin hota

judai ka tassur mujh pe kuchh hai aap par kuchh hai

asar har baat ka har shaKHs par yaksan nahin hota

mera dil apne hi ehsas ki shiddat ganwa baiTha

tumhaari baat ka afsos ab chandan nahin hota

tazad apni tabiat ka mizaj us ki mohabbat ka

har andesha ba-wajh-e-gardish-e-dauran nahin hota

samundar ki tahen aur aasman ki sab haden chhu len

magar insan ko apni zat ka irfan nahin hota

'nasim' apne liye tum ne dua bhi tark kar Dali

to kya ab KHud se milne ka tumhein arman nahin hota