kisi ke wa’da-e-farda pe umr haar chale

kisī ke vā’da-e-fardā pe 'umr haar chale

ham ik hasīn tasavvur meñ din guzār chale

dil-o-nigāh tirī ik nazar pe vaar chale

hazār shukr ki sadqa tirā utaar chale

tire baġhair bhī jiine ko ham ji.e to magar

yūñhī ki jaise bayābāñ meñ shab guzār chale

ye imtiyāz hai saaqī to mai-kade ko salām

sañbhāl sāġhar-o-mīnā ki bāda-ḳhvār chale

ham aa rahe haiñ chaman meñ kaho pa.e-tā'zīm

idhar qafas se chaleñ ham udhar bahār chale

hayāt qarz thī goyā vafā kī gardan par

chalo ye qarz bhī ahl-e-vafā utaar chale

mizāj-e-yār badalnā na thā kabhī 'afzal'

ham aaj apnī vafāoñ pe sharmsār chale

kisi ke wa’da-e-farda pe 'umr haar chale

hum ek hasin tasawwur mein din guzar chale

dil-o-nigah teri ek nazar pe war chale

hazar shukr ki sadqa tera utar chale

tere baghair bhi jine ko hum jie to magar

yunhi ki jaise bayaban mein shab guzar chale

ye imtiyaz hai saqi to mai-kade ko salam

sanbhaal saghar-o-mina ki baada-KHwar chale

hum aa rahe hain chaman mein kaho pae-ta'zim

idhar qafas se chalen hum udhar bahaar chale

hayat qarz thi goya wafa ki gardan par

chalo ye qarz bhi ahl-e-wafa utar chale

mizaj-e-yar badalna na tha kabhi 'afzal'

hum aaj apni wafaon pe sharmsar chale