kisi ke waste jita hai ab na marta hai

kisī ke vāste jiitā hai ab na martā hai

har aadmī yahāñ apnā tavāf kartā hai

sab apnī apnī nigāheñ sameT lete haiñ

vo ḳhush-libās sar-e-shām jab bikhartā hai

maiñ jis kī raah meñ har shab diye jalātā huuñ

vo māhtāb zamīñ par kahāñ utartā hai

hamārā dil bhī hai vīrāñ haveliyoñ kī tarah

tamām raat yahāñ koī aah bhartā hai

maiñ us ke naqsh-e-kaf-e-pā bhī chhū nahīñ saktā

vo tez-gām havāoñ ke par katartā hai

na bām-e-ārzū raushan na sā.ebān-e-talab

sarā-e-dil meñ kahāñ koī ab Thahartā hai

sab apne aap se ḳhā.if haiñ in dinoñ 'aḳhtar'

har ek shaḳhs yahāñ aa.ine se Dartā hai

kisi ke waste jita hai ab na marta hai

har aadmi yahan apna tawaf karta hai

sab apni apni nigahen sameT lete hain

wo KHush-libas sar-e-sham jab bikharta hai

main jis ki rah mein har shab diye jalata hun

wo mahtab zamin par kahan utarta hai

hamara dil bhi hai viran haweliyon ki tarah

tamam raat yahan koi aah bharta hai

main us ke naqsh-e-kaf-e-pa bhi chhu nahin sakta

wo tez-gam hawaon ke par katarta hai

na baam-e-arzu raushan na saeban-e-talab

sara-e-dil mein kahan koi ab Thaharta hai

sab apne aap se KHaif hain in dinon 'aKHtar'

har ek shaKHs yahan aaine se Darta hai