kisi ke waste ye saneha kuchh bhi nahin hoga

kisī ke vāste ye sāneha kuchh bhī nahīñ hogā

yahāñ muflis kā 'az.har' ḳhūñ-bahā kuchh bhī nahīñ hogā

javāñ beToñ meñ vālid ke asāse baT chuke hoñge

havelī meñ parindoñ ke sivā kuchh bhī nahīñ hogā

yahī behtar hai ghar kī baat apne ghar meñ rahne do

Dh.inDhorā pīTne se fā.eda kuchh bhī nahīñ hogā

na aa.egā na baiThegā na vo tum ko manā.egā

mirī maano anokhā vāqi.a kuchh bhī nahīñ hogā

na jaane kyoñ ulajhte haiñ ka.ī be-rabt bātoñ par

agarche jānte haiñ faisla kuchh bhī nahīñ hogā

tumhāre baa'd jaane zindagī kaise basar hogī

koī manzil na koī rāsta kuchh bhī nahīñ hogā

tumhārā ġham mirī āvāz ko patthar banā degā

mire lahje meñ talḳhī ke sivā kuchh bhī nahīñ hogā

ḳhabar kyā thī ki jis ko pūjte haiñ ek muddat se

vo ik rangīñ tasavvur ke sivā kuchh bhī nahīñ hogā

hamesha kī tarah 'az.har' baḌe paimān bāñdhe haiñ

par agle saal bhī ham ne kiyā kuchh bhī nahīñ hogā

kisi ke waste ye saneha kuchh bhi nahin hoga

yahan muflis ka 'azhar' KHun-baha kuchh bhi nahin hoga

jawan beTon mein walid ke asase baT chuke honge

haweli mein parindon ke siwa kuchh bhi nahin hoga

yahi behtar hai ghar ki baat apne ghar mein rahne do

DhinDhora piTne se faeda kuchh bhi nahin hoga

na aaega na baiThega na wo tum ko manaega

meri mano anokha waqia kuchh bhi nahin hoga

na jaane kyon ulajhte hain kai be-rabt baaton par

agarche jaante hain faisla kuchh bhi nahin hoga

tumhaare ba'd jaane zindagi kaise basar hogi

koi manzil na koi rasta kuchh bhi nahin hoga

tumhaara gham meri aawaz ko patthar bana dega

mere lahje mein talKHi ke siwa kuchh bhi nahin hoga

KHabar kya thi ki jis ko pujte hain ek muddat se

wo ek rangin tasawwur ke siwa kuchh bhi nahin hoga

hamesha ki tarah 'azhar' baDe paiman bandhe hain

par agle sal bhi hum ne kiya kuchh bhi nahin hoga