kisi KHata se hamein inhiraf thoDi hai

kisī ḳhatā se hameñ inhirāf thoḌī hai

hamārā ḳhud se koī iḳhtilāf thoḌī hai

basāratoñ ke alam-dār haiñ yahāñ kuchh log

har ik nazar pe añdherā ġhilāf thoḌī hai

kabhī to ham bhī tumhārā surāġh pā leñge

tumhārā shahr koī koh-e-qāf thoḌī hai

ye ā.īna tumheñ tum sā dikhā nahīñ saktā

agarche saaf hai utnā bhī saaf thoḌī hai

zabān-e-ḳhalq ko naqqāra-e-ḳhudā samjho

ye jānte haiñ sabhī inkishāf thoḌī hai

zamīñ kā ghaav hai miTTī se bhar hī jā.egā

hamāre dil kī tarah kā shigāf thoḌī hai

ham ehtijāj bapā kar rahe haiñ apne ḳhilāf

hamārā shahr hamāre ḳhilāf thoḌī hai

isī liye to nahātā hai bārishoñ meñ vajūd

hai ābdīda magar e'tirāf thoḌī hai

kisi KHata se hamein inhiraf thoDi hai

hamara KHud se koi iKHtilaf thoDi hai

basaraton ke alam-dar hain yahan kuchh log

har ek nazar pe andhera ghilaf thoDi hai

kabhi to hum bhi tumhaara suragh pa lenge

tumhaara shahr koi koh-e-qaf thoDi hai

ye aaina tumhein tum sa dikha nahin sakta

agarche saf hai utna bhi saf thoDi hai

zaban-e-KHalq ko naqqara-e-KHuda samjho

ye jaante hain sabhi inkishaf thoDi hai

zamin ka ghaw hai miTTi se bhar hi jaega

hamare dil ki tarah ka shigaf thoDi hai

hum ehtijaj bapa kar rahe hain apne KHilaf

hamara shahr hamare KHilaf thoDi hai

isi liye to nahata hai barishon mein wajud

hai aabdida magar e'tiraf thoDi hai