kisi KHayal ki surat mein ab guman se nikal

kisī ḳhayāl kī sūrat meñ ab gumāñ se nikal

suḳhan kā tiir hai to hoñT kī kamāñ se nikal

kabhī to mujh ko mire aks tak rasā.ī de

ai aa.ine tū kisī roz darmiyāñ se nikal

chhupe hue koī manzar mirī nigāh meñ aa

ai koī an-kahe misre mirī zabāñ se nikal

tire sivā bhī bahut log muntazir haiñ mire

so apnī choT lagā aur dāstāñ se nikal

mire nasīb ke taare kahīñ fazāoñ meñ mil

maiñ chal paḌā huuñ zamīñ se tū āsmāñ se nikal

kisi KHayal ki surat mein ab guman se nikal

suKHan ka tir hai to honT ki kaman se nikal

kabhi to mujh ko mere aks tak rasai de

ai aaine tu kisi roz darmiyan se nikal

chhupe hue koi manzar meri nigah mein aa

ai koi an-kahe misre meri zaban se nikal

tere siwa bhi bahut log muntazir hain mere

so apni choT laga aur dastan se nikal

mere nasib ke tare kahin fazaon mein mil

main chal paDa hun zamin se tu aasman se nikal