kisi KHayal mein khone ki justuju to karo

kisī ḳhayāl meñ khone kī justujū to karo

kisī se milne kī pahle kuchh aarzū to karo

harīf kis liye ḳhā.if haiñ kyoñ vo bad-zan haiñ

unheñ bulāo kabhī un se guftugū to karo

raheñge raah meñ sang-e-girāñ na dīvāreñ

amal ke jazba ko thoḌā sā jañg-jū to karo

hayāt dhuup bhī hai bādaloñ kā saaya bhī

vo koī haal ho jiine kī aarzū to karo

ḳhizāñ kā daur ḳhizāñ-dīda kyoñ banāte ho

tum aise daur meñ kuchh zikr-e-rang-o-bū to karo

tumhārī zaat ke bhī tum se kuchh taqāze haiñ

huā hai chaak jo dāman use rafū to karo

kuchh aur vus.at-e-qalb-o-nazar zarūrī hai

kuchh aur ġham bhī abhī dil ke rū-ba-rū to karo

na kaam aa.e to behtar hai jazba-e-nafrat

jo kaam lenā hai jazbe ko nek-ḳhū to karo

kisi KHayal mein khone ki justuju to karo

kisi se milne ki pahle kuchh aarzu to karo

harif kis liye KHaif hain kyon wo bad-zan hain

unhen bulao kabhi un se guftugu to karo

rahenge rah mein sang-e-giran na diwaren

amal ke jazba ko thoDa sa jang-ju to karo

hayat dhup bhi hai baadalon ka saya bhi

wo koi haal ho jine ki aarzu to karo

KHizan ka daur KHizan-dida kyon banate ho

tum aise daur mein kuchh zikr-e-rang-o-bu to karo

tumhaari zat ke bhi tum se kuchh taqaze hain

hua hai chaak jo daman use rafu to karo

kuchh aur wusat-e-qalb-o-nazar zaruri hai

kuchh aur gham bhi abhi dil ke ru-ba-ru to karo

na kaam aae to behtar hai jazba-e-nafrat

jo kaam lena hai jazbe ko nek-KHu to karo